B. Skrifað á skjáinn

Skrifað á skjáinn

Við minnum á að ritvinsluforrit (eins og t.d. Microsoft Word) er kjörinn vettvangur fyrir stafavinnu og kynni af lyklaborðinu.

Í byrjun er feikinóg að barnið skrifi þá stafi sem því dettur í hug. Síðan má fara að finna stafi sem það þekkir (t.d. stafinn sinn, stafinn hennar mömmu, hans pabba o.s.frv.). Næsta skref er svo að skrifa einföld orð og jafnvel stuttar setningar.

Þar sem að stafirnir sem barnið sér á lyklaborðinu eru hástafir (stórir stafir) er ágætt að byrja á því að nota þá. Sjálfsagt er að sýna barninu lágstafina (litlu bókstafina) og hvetja það til að nota þá (sérstaklega ef það þekkir þá betur).

Þegar barnið skrifar er upplagt að auka leturstærðina og jafnvel breyta um lit á textanum.

Það að prenta út stafavinnuna, hengja hana e.t.v. upp á vegg og jafnvel senda stafablað í pósti eða tölvupósti til ömmu og afa er ágætis umbun fyrir unnið verk.