Föstudaginn 27. september fer fram doktorsvörn við Deild erlendra tungumála, málvísinda og bókmennta innan Hugvísindasviðs Háskóla Íslands. Þá mun Anna Jeeves verja doktorsritgerð sína: Relevance and the L2 Self in the Context of Icelandic Secondary School Learners: Learner Views (Gildi og tungumálasjálf íslenskra framhaldsskólanemenda: Viðhorf nemenda).
Þetta verður fyrsta doktorsvörnin við Deild erlendra tungumála.
Andmælendur eru dr. Glenn Ole Hellekjær, prófessor við Háskólann í Osló og dr. Martin Lamb, prófessor við Háskólann í Leeds.
Dr. Birna Arnbjörnsdóttir, prófessor við Deild erlendra tungumála, bókmennta og málvísinda, var aðalleiðbeinandi doktorsefnis en í doktorsnefnd sátu auk hennar dr. Hafdís Ingvarsdóttir, prófessor á Menntavísindasviði og dr. Judit Kormos, prófessor við Háskólann í Lancaster.
Dr. Hólmfríður Garðarsdóttir prófessor og forseti Deildar erlendra tungumála stjórnar athöfninni sem fer fram í Hátíðasal Háskóla Íslands í Aðalbyggingu og hefst kl. 13.00.
[expand title=“Ágrip úr rannsókn“ trigclass=“highlight“]Viðfangsefnið í ritgerðinni er viðhorf nemenda til enskunáms í skóla og um það hvert gildi formlegs náms er í málaumhverfi þar sem enskan er víða notuð fyrir utan skólastofuna. Gildi hefur lítið verið rannsakað í sambandi við hvata í tungumálanámi. Viðtöl voru notuð til þess að opna og kanna umfjöllunarefni ritgerðarinnar. Rætt var við sextán framhaldsskólanemendur í því skyni að fá skoðanir þeirra á yfirstandandi enskunámi. Úr tuttugu og tveimur viðtölum við unga Íslendinga í háskólanámi eða vinnu fengust gögn um viðhorf þeirra til ensku í framhaldsskóla og hvert þeir töldu gildi þess eftir framhaldsskólanám.
Niðurstöðurnar sýna að staða ensku á Íslandi gerir landið um margt að góðu rannsóknarefni, þar sem enska er notuð daglega og Íslendingar þurfa mjög góða málfærni bæði í háskólanámi og við vinnu. Hins vegar hefur þessi sterka staða ensku í umhverfinu þau áhrif að sumir skólanemendur telja margra ára enskunám óþarft. Sýnt er fram á að gildi enskunnar birtist sem mjög einstaklingsbundið og breytilegt eftir hugmyndum um notkun hennar í dag, sem var og sem verður. Margir þátttakendanna höfðu skýra sýn á hvernig enskan gagnaðist þeim bæði í háskólanámi og vinnu og hvernig framhaldsskólanámið nýttist þeim í því sambandi. Þeir gerðu sér grein fyrir því að aukin færni kemur ekki úr umhverfinu utan skóla.
Að lokum sýna eigindleg gögn að Ísland stendur fyrir utan viðurkennd líkön um hvata í annarsmálsnámi. Nýtt uppfært líkan er sett fram sem nær til Íslands (og ef til vill einnig til annarra landa þar sem enskan er áberandi í umhverfinu). Tillögur eru settar fram um nýjar áherslur fyrir enskukennara og enskunemendur á Íslandi, sem felast meðal annars í því að gefa nemendum aukið val á námsefni og verkefnum.
[/expand]
